Nakasinati karon og grabeng pagkunhod ug pagkahubas sa tubig ang Malinao Creek nga nahimutang sa Barangay Kalasungay, dakbayan sa Malaybalay tungod sa nagpadayong epekto sa dry spell o El Niño sa probinsya.
Base sa mga nanggawas nga hulugway kalabot sa kahimtang sa niini, makita ang sitwasyon sa maong sapa diin ang mga dagkong bato ug balas na lamang ang mipatigbabaw sa tibuok dapit human sa pipila ka katuigan nga naila kini nga bahaonon ug dako ang bu-og sa tubig.
Sa pagkakaron, nagpabiling gamay o hinay nga agas na lamang sa tubig ang nahabilin sa maong creek.
Gihimug-atan nga kini usa ka mamatikdan nga timailhan sa grabeng epekto sa climate change ug hulaw nga padayong nag-igo sa tibuok rehiyon, nga direktang naghatag og hulga sa suplay sa tubig ug sa mga lokal nga komunidad sa Bukidnon.