Gipahimutang sa Land Transportation Franchising and Regulatory Board Region 10 ang pito ka bus isip emergency transport aron matabangan ang mga lugar nga kulang ang biyahe tunga sa transport strike sa rehiyon.
Sa pakighinabi sa Bombo Radyo Malaybalay kay Alexes Joseph Aljo R. Bendijo, Regional Director Land Transportation Franchising and Regulatory Board, Region-X, Na matod pa, gipakatap ang mga bus sa Cagayan de Oro ug Malaybalay diin tulo ang naka-standby sa ilang opisina, duha sa Provincial Capitol ug duha sa City Hall aron dayong makaresponde sa mga ruta nga gamay o halos walay nagabiyahe.
Giandam usab ang mga inspector sa LTFRB sa pag-escort sa mga pasahero kung adunay ma-stranded samtang padayon ang ilang monitoring ug pagpagawas og situational report matag upat ka oras pinaagi sa ilang opisyal nga Facebook page.
Gipasabot usab niya nga ginare-respeto sa ahensya ang desisyon sa ubang transport groups nga niapil sa welga, apan gi-awhag gihapon ang mga drayber nga mopadayon sa biyahe ilabina sa rush hour aron malikayan ang kakulang sa transportasyon, labi na karong semana sa final exams sa mga estudyante.
Sa katapusan, gipadayag sa LTFRB-10 nga nagpadayon ang libreng sakay ug gipaspasan usab ang distribusyon sa fuel subsidy pinaagi sa GCash aron maminusan ang epekto sa pagsaka sa presyo sa krudo sa mga drayber ug operators sa rehiyon.