Hugot karon nga gina-monitor sa kagamhanan sa Pilipinas ang nagkagrabe nga sitwasyon sa nasud sa Venezuela human ang mga report sa gilusad nga operasyong militar sa Amerika.
Matud pa ni Foreign Affairs Spokesperson Angelica Escalona, nanawagan ang Pilipinas sa tanang panig nga sulbaron ang ilang panagbingkil sa malinawon nga paagi. Gihangyo usab sa nasud ang paglikay sa bisan unsang lakang nga makapasamot lang sa tensyon sa maong rehiyon.
Kini nga pamahayag sa DFA migawas human ang anunsyo ni U.S. President Donald Trump nga nagpahigayon ang Estados Unidos og usa ka “large-scale strike” batok sa Venezuela. Kini nga operasyon miresulta matud pa sa pagka-aresto ni Venezuelan President Nicolas Maduro ug sa iyang asawa.
Sa pikas bahin, ang Philippine Embassy sa Colombia nga maoy nagdumala sa mga Pilipino didto sa Venezuela nagpahinumdom nga magpabiling alerto.
Giawhag sila nga mangita na og luwas nga mga lugar nga puy-an o tagoan kung pananglitan mosamot pa ang kagubot.
Base sa record sa DFA, adunay gibana-bana nga (74) ka mga Pilipino ang kasamtangang nanimuyo ug nagtrabaho sa Venezuela.