MALAYBALAY CITY – Gibarugan sa Federation of Free Workers (FFW) ang krusyal nga papel sa mga kababayen-an sa labor force ilabi na sa pagsaka sa gasto sa panginabuhi karong panahona.
Sa pakighinabi sa Bombo Radyo Malaybalay, giklaro ni Atty. Jose Sonny Matula, presidente sa FFW, nga dako og matampo ang mga inahan sa ekonomiya sa pamilya kon tugotan silang magamit ang ilang kapasidad ug propesyon. Gipasabot sa abogado nga walay balaod nga nagdili sa mga asawa sa pagpanarbaho ug dili kini pwedeng babagan sa mga bana tungod kay katungod kini sa matag indibidwal.
Gibutyag usab ni Matula nga sa iyang hapit tulo ka dekada nga pagpanerbisyo isip abogado, daghan na siyang nasugatan nga kaso diin ang mga asawa giabuso ug gidid-an sa ilang mga bana sa pagpangita og trabaho. Busa, hugot ang iyang panawagan nga respetuhon ang desisyon ug katungod sa mga kababayen-an aron makatabang sa pag-asenso sa pamilya ug sa tibuok katilingban.