Gipasabot sa pipila ka mga senador nga ang tinuod nga hinungdan sa kasamok tali sa Pilipinas ug China mao ang pangdaog-daog sa China Coast Guard sa West Philippine Sea. Matod ni Senator Risa Hontiveros, ang mga agresibong lihok sa China—sama sa paggamit og water cannon, pagpanghasi sa mga mangingisda, ug pagbangga sa mga barko sa Philippine Coast Guard sulod sa atong Exclusive Economic Zone—mao ang nagpabug-at sa tensyon, ug dili ang mga pamahayag sa Chinese Embassy.
Gidugangan ni Senator Erwin Tulfo nga katungod sa Senado ang pagpagawas og mga resolusyon base sa Vienna Convention, diin obligado ang mga langyaw nga diplomat sa pagrespeto sa balaod sa Pilipinas. Gidepensahan usab sa mga senador si Commodore Jay Tarriela sa PCG, kay igo ra kining naghimo sa iyang trabaho sa pagpanalipod sa nasod.Sa pagkakaron, nanindigan ang Senado nga dili sila magpahilom ug itugyan na nila sa Department of Foreign Affairs (DFA) ang sunod nga mga lakang aron mapanalipdan ang dignidad sa Pilipinas.