Gibalhin sa Senate impeachment court sa Hulyo 20 ang pagtestigo ni National Bureau of Investigation (NBI) Director Melvin Matibag sa impeachment trial batok kang Vice President Sara Duterte.
Tungod niini, makatestigo si Matibag sa dili pa ang iyang opisyal nga biyahe ngadto sa Bangkok, Thailand gikan Hulyo 21 hangtod 22.
Bisan pa sa pagsupak sa depensa ug sa nagkalainlaing panglantaw sa hangyo sa prosekusyon nga ibalhin ang pagtestigo sa NBI chief, giaprobahan ni Trial Presiding Officer Francis Escudero ang maong sugyot.
Apan, iyang gimando nga ipadayon ni Matibag ang iyang pagtestigo hangtod makompleto sa prosekusyon ug depensa ang ilang pagpangutana kaniya.
Matud pa ni Escudero, kon dili mahuman ang pagtestigo ni Matibag sa Hulyo 20, ipadayon kini sa sunod nga petsa sa pagdungog aron makompleto ang cross-examination, redirect examination ug recross examination kon gikinahanglan.
Gimandoan usab pinaagi og subpoena si Matibag nga motungha sa Senate impeachment court alas-2:00 sa hapon sa Hulyo 20.
Gilauman nga motestigo si Matibag kabahin sa imbestigasyon sa NBI sa pahayag ni Vice President Sara Duterte niadtong Nobyembre 23, 2024, diin iyang giingong adunay gikontrata aron mopatay kang Presidente Ferdinand Marcos Jr., First Lady Liza Araneta-Marcos ug kanhi House Speaker Martin Romualdez kon adunay mahitabo sa Bise Presidente.