Gibutyag sa Department of Justice (DOJ) nga dili mahimong babag ang ‘legislative immunity’ sa usa ka mambabalaod sa pagpatuman sa warrant of arrest.
Sumala ni Prosecutor General Richard Anthony Fadullon, dili maprotektahan sa maong immunity ang usa ka opisyal kung mag-isyu og arrest warrant ang International Criminal Court (ICC).
Gumikan niini, posible gihapon nga maaresto si Sen. Bato Dela Rosa bisan pa nga anaa siya sa kustodiya sa Senado kung adunay warrant gikan sa International Tribunal.
Dugang pa ni Fadullon nga ang paggamit sa legislative immunity limitado lamang sa mga kaso nga adunay silot nga 6 ka tuig ug ubos sa pagkabilanggo.
Dugang pa niini, kini magamit lamang samtang anaay sesyon ang Kongreso, ug kung naka-recess na, wala nay restriksyon aron malikayan ang pag-aresto.
Bisan pa niini, giila sa DOJ nga posible gamiton sa senador ang legislative immunity kung mugawas ang arrest warrant.
Matud ni Fadullon, bisan tuod kini ang una nga posisyon ni Sen. Bato Dela Rosa, wala pa silay kumpirmasyon kung mosalmot pa kini sa Senado aron mangayo og proteksyon.
Apan miluwat ang opisyal nga kini nga lakang, nga posibleng buhaton sa mambabalaod, apil sa ilang gi-analisa alang sa bisan unsang aksyon nga buhaton.
Parehas usab ang panan-aw ni Chief State Counsel Dennis Arvin L. Chan, nga giisip nila ang pagka-mambabalaod ni Sen. Bato sa ilang pagtan-aw sa kaso.
Bisan pa man niini, wala kini mitubag kung makaaapekto ba ang posisyon sa senador sa pagpatuman sa warrant gikan sa International Tribunal.
Sa pagkakaron, gibarugan sa DOJ nga wala pa’y gipagawas o gipadala nga ICC warrant of arrest batok kang Sen. Bato Dela Rosa.
Kini supak sa pahayag sa kanhing kalihim sa DOJ nga karon nahimong Ombudsman, si Jesus Crispin Remulla, nga miingon nga adunay arrest warrant nga gi-isyu, apan ang ilang nahuptan karon mao lamang ang di-opisyal nga kopya sa dokumento.