Nakabsan og kinabuhi ang usa ka miyembro sa Barangay Public Safety Officer (BPSO) samtang kapin sa napulo ka kaubanan niini ang naangol sa duguong aksidente sa Barangay Maluko, Manolo Fortich, Bukidnon, kagahapon sa hapon.
Sa pakighinabi sa Bombo Radyo Malaybalay, gikumpirma ni PLTCOL Rogie Ortencio, hepe sa Manolo Fortich MPS, ang pagkamatay ni George Humamil, 53-anyos ug residente sa Barangay 7, ning siyudad. Nasayran nga pauli na unta ang biktima uban ang iyang mga kauban gikan sa usa ka seminar sa Misamis Oriental sa dihang nahitabo ang trahedya.
Base sa inisyal nga imbestigasyon, nagka-problema sa brake ang maong sakyanan hinungdan nga nawad-an og kontrol ang drayber ug mibangga sa usa ka fruit stand ug motorsiklo sa pikas lane. Gideklarang dead on arrival sa ospital ang biktima samtang ang ubang mga pasahero nga nakaangkon og mga samad ug bun-og daling natabangan sa Barangay Maluko Rescue Team. Padayon karon ang panawagan sa lokal nga kagamhanan ngadto sa mga motorista nga mag-amping ug sundon ang speed limit aron malikayan ang susamang trahedya sa dalan.