Nagpaalim karon sa balay tambalanan ang usa ka 60-anyos nga babaye human seryosong gitigbas sa wala mailhing suspek sulod mismo sa iyang panimalay sa Purok 6, Barangay Danggawan, Maramag, Bukidnon, niadtong Mayo 7.
Matod pa sa Maramag Municipal Police Station, natulog lamang ang biktima uban sa iyang duha ka mga anak sa dihang kalit nga misulod ang suspek pinaagi sa luyo nga pultahan sa ilang balay alas-12:42 sa kadlawon. Gamit ang mahait nga hinagiban, gitigbas sa suspek ang biktima sa ulohan nga bahin. Nasayran nga nagtabon og berde nga t-shirt sa iyang ulo ang maong suspek aron dili mailhan ang iyang panagway.
Dali nga gidala sa mga responding Bantay Bayan ang biktima ngadto sa Bukidnon Provincial Hospital aron mahatagan og dinaliang medikal nga atensyon. Sa pagkakaron, gilusad na sa kapulisan ang hot pursuit operation batok sa mikalagiw nga suspek samtang padayon pang ginasuta ang motibo sa maong duguong pag-atake.