Nagpagawas og pasidaan ang pipila ka kompanya bahin sa posibleng pagsaka sa bayranan sa kuryente karong bulan sa Mayo tungod sa paghuyang sa bili sa piso ug pagmahal sa presyo sa spot market. Sumala ni Joe Zaldarriaga, ang tensyon sa Middle East ug ang taas nga konsumo sa kuryente tungod sa grabeng kainit maoy nag-unang rason sa maong pag-usbaw.
Bisan pa man niini, adunay gamay nga bawas-presyo gikan sa refund ug pagtangtang sa VAT sa natural gas gikan sa Malampaya.
Giklaro usab sa kompanya nga magpabilin ang “public policy charges” sa billing hangtod nga wala pa’y bag-ong balaod nga mopapas niini.
Agig pagtuman sa mando sa ERC, suspindido una ang disconnection ug ipatuman ang hinay-hinay nga sistema sa pagbayad alang sa mga kustomer nga mogamit og ubos sa 200 kWh.
Gilauman nga mapagaan niini ang palas-anon sa mga kabos nga pamilya gikan ning bulana hangtod sa Hulyo 2026.
Giawhag usab ang publiko nga magdaginot sa paggamit sa kuryente aron dili kaayo moburot ang ilang binulan nga balayronon.