Gipadayag ni Senate Pro tempore Panfilo Lacson nga sa kasamtangang imbestigasyon sa flood control scam, wala pa giingong matudlo nga usa ka “overall mastermind” sa maong iregularidad.
Apan adunay lain-laing “mastermind” sa kada distrito sa Department of Public Works and Highways.
Matud ni Lacson, mas nakita sa komite nga ang problema naggikan sa lain-laing district engineering offices sa Department of Public Works and Highways, diin adunay mga organisadong grupo nga giingong naglihok sa kada distrito ug maoy nalambigit sa mga “ghost projects” ug substandard nga mga proyekto.
Gihatagan og ehemplo ang First District sa Bulacan nga adunay dako nga pondo sa flood control projects apan giingong daghan sa mga proyekto ang ghost o dili tarong ang pagpatuman.
Bisan pa niini, sigon ni Lacson nga posible gihapon nga kasuhan ang mga nalambigit sama ni Zaldy Co ug uban pang indibidwal kung mapamatud-an ang ilang partisipasyon sa mga anomalya, lakip na ang posibleng plunder cases.