Tapos na ang walo ka adlaw nga pagpangita sa usa ka 65-anyos nga lalaki human kini nakaplagang wala na’y kinabuhi duol sa Manupali River sa Purok 5, Barangay Poblacion, Lantapan, Bukidnon.
Sa pakighinabi sa Bombo Radyo Malaybalay, giila ni PMaj. Anthony Townend, Chief of Police sa Lantapan MPS, ang biktima nga si Lemuel Montecalvo Montibon, naila nga si “Momong.” Nadiskobrehan ang lawas sa biktima human duna’y nakabantay og mialisngaw nga baho sa dapit, diin nakit-an ang patay’ng lawas nga nagsugod na sa pagkadunot.
Base sa gihimong pagsusi sa Rural Health Unit, gituohang aksidenteng natagak ang biktima gikan sa kahoy samtang nangita og dugos sa buyog, diin ulo una ang nibanda sa bato nga hinungdan sa iyang dinaliang kamatayon. Gikumpirma sa kapulisan nga walay nahitabong foul play sa maong insidente sanglit nag-inusara lamang ang biktima sa iyang pagpanguha og dugos. Ang patay’ng lawas gidala na sa usa ka punerarya dinhi sa siyudad sa Malaybalay alang sa saktong disposisyon.