Gilaoman nga sa dili pa mahuman ang bulan sa Marso ning tuiga, ipatuman na sa lalawigan sa Bukidnon ang programang P20 per kilo nga bugas nga gitumong alang sa tanang katawhan.
Sa eksklusibong pakighinabi sa Bombo Radyo Malaybalay kang Glenn De Otoy, Information Officer sa NFA–Bukidnon, gibutyag niini nga andam na ang ahensya sa pagpatuman sa programang gitawag og “Rice for All”, diin ang bugas ibaligya sa kantidad nga P20 matag kilo.
Matud pa niini, kabahin kini sa mas lapad nga inisyatiba sa gobyerno aron mapagaan ang gasto sa pagkaon sa katawhan, hilabi na karong padayon ang pagsaka sa presyo sa palaliton. Sa kasamtangan, gipang-apod-apod ang programang “Benteng Bigas, Meron Na”, nga anaa sa NFA warehouse sa Maramag.
Ang maong programa gitagana alang sa mga benepisyaryo sama sa single parents, persons with disabilities, senior citizens, myembro sa IPs, ug mga myembro sa 4Ps. Pinaagi niini, ang matag benepisyaryo tugutan nga makapalit og hangtod 30 kilos nga bugas matag bulan.
Samtang, ang mga mangingisdaay ug mag-uuma sa humay gihatagan usab og alokasyon, diin mamahimong makapalit og 10 kilos nga bugas matag bulan ilawom sa maong programa.