Kapin 30 ka mga kanhing rebelde nga gitawag og “Friends Rescued” ug 167 ka bag-ong mitahan nga kanhing miyembro sa Militia ng Bayan ang opisyal nga mibalik sa sabakan sa gobyerno atol sa usa ka seremonya sa Barangay St. Peter ning dakbayan sa Malaybalay.
Matud ni Lt. Col. Jeorge Jallorina, commander sa 8th Infantry Brigade, ang maong pagtahan nagpasabot sa pagpakig-uli sa kalinaw human sa pipila ka tuig nga pakigbisog ubos sa Guerrilla Front 8.Atol sa seremonya, gipermahan sa mga kanhing rebelde ang kasabutan sa pag-withdraw sa ilang suporta sa CPP-NPA nga nagpasabot nga dili na sila makigbatok sa gobyerno ug andam na silang mamuyo nga malinawon.
Sa laing bahin, gipahibalo sa TESDA nga hatagan nila og trainings ug livelihood assistance ang mga “Friends Rescued” base sa ilang kahanas ug scholarship program alang sa lima ka anak sa mga mitahan nga rebelde.
Ang kalihokan kabahin sa padayon nga kampanya sa gobyerno aron matabangan ang mga kanhing rebelde nga mubalik sa sabakan sa komunidad ug makapuyo nga produktibo ug malinawon.