Gipahibalo sa National Mapping and Resource Information Authority (NAMRIA) ang opisyal nga administrative map sa Pilipinas nga klarong nagpakita sa West Philippine Sea (WPS).
Sumala sa NAMRIA, ang mga opisyal nga mapa ug nautical charts sa nasud importante kaayo sa pagduso ug pagpanalipod sa maritime jurisdiction sa Pilipinas sa WPS.
Sugod pa niadtong 2012, sa ilawom sa administrasyon ni Aquino, pormal nang gigamit sa gobyerno ang ngalan nga “West Philippine Sea” sa mga publikasyon, ug padayon kini nga ibutang sa tanang opisyal nga mapa ug charts.
Gipasabot sa ahensya nga ang mga materyales gigamit sa mga mariners, planners, researchers, ug lain-laing institusyon sa sulod ug gawas sa nasud para sa navigation, geographic information, ug kaluwasan sa dagat.
Gibutyag usab sa NAMRIA nga ang exclusive economic zone (EEZ) sa Pilipinas moabot hangtod 200 nautical miles gikan sa archipelagic baselines, subay sa Republic Act 9522.
Ang datos nakabase sa eksaktong geospatial data nga makatabang sa husto nga pagtino sa maritime limits.
Giklaro sa ahensya nga ang ilang mga nautical charts nagsunod sa international hydrographic standards ug isinumite sa mga international technical bodies sama sa International Hydrographic Organization, aron maapil ang datos sa Pilipinas sa global maritime record.
Sumla sa NAMRIA nga ang ilang mandato mao ang paghatag og accurate ug reliable nga geospatial information para sa nasud, nga importante sa maritime safety, environmental management, disaster preparedness, ug dokumentasyon sa national territory.
Dugang pa, giisa sa NAMRIA nga padayon nilang pagpanalipod sa mandato isip suporta sa national sovereignty ug sa husto nga pagdumala sa bahandi sa nasud.