Mokabat sa 81 ka mga suspetsado ang malampusong natanggong sa bilanggoan human sa gikasang 87 ka sunod-sunod nga operasyon sa Bukidnon Police Provincial Office (BUKPPO) sulod sa usa ka semana ning kasamtangang bulan sa Mayo.
Sa eksklusibong pakighinabi sa Bombo Radyo Malaybalay, gibutyag ni Police Captain Sheila Joy P. Jangad, ang tigpamaba sa Bukidnon Police Provincial Office (BUKPPO), nga nagpabiling nangunang target sa ilang kampanya ang ilegal nga droga diin nakatala sila og 18 ka operasyon ug pagka-aresto sa 25 ka mga tigpayuhot sa ilegal na droga. Matud ni Jangad, kasagaran sa mga malampusong operasyon sa droga natigayon didto sa mga siyudad sa Valencia ug Malaybalay.
Gawas sa droga, gilupig usab sa kapolisan ang pagpamaligya og smuggled nga sigarilyo nga miresulta sa dose (12) ka operasyon ug dose (12) ka mga naarestao, uban sa mga operasyon batok sa illegal gambling, illegal logging, ug pagkasikop sa mga wanted persons. Giduggang sa opisyal nga padayon ang ilang pakig-alayon sa mga LGU ug Department of Health aron hingpit nga masumpo ang mga kontrabando ug mapadayon ang drug-free workplace ug komunidad sa tibuok lalawigan.