Gihimakak sa Malacañang ang alegasyon nga gi-downplay kon wala giseryoso sa gobyerno ang epekto sa nagkagrabeng tensyon sa Middle East.
Kini hilabi na sa padayon nga pagsaka sa presyo sa petrolyo ug posibleng epekto niini sa ekonomiya sa nasud.
Matud ni Palace Press Officer Under Secretary Claire Castro, nagpadayon ang gobyerno sa pagpatuman og mga konkretong lakang aron makulangan ang kabug-aton sa mga Pilipino ug dili pasagdan ang kahimtang lakip na ang mga OFWs sa Middle East.
Dugang pa niini, nga wala gi-downplay ang sitwasyon, gani gimando matud pa mismo ni Presidente Ferdinand Marcos Jr. ang pagtukod og usa ka Crisis Management Team nga motutok sa krisis, lakip na ang pagmonitor sa presyo sa produktong petrolyo, kahimtang sa mga Overseas Filipino Workers, ug uban pang posibleng epekto niini sa nasud.
Sumala ni USec. Castro, gipaabot na lamang ang pormal nga dokumento alang sa komposisyon ug ang mangulo sa maong team, samtang nagpadayon ang koordinasyon sa nagkalain-laing ahensya sa gobyerno aron masiguro ang epektibong pagtubag sa padayon nga tensyon nga nakaapekto sa global market.