Posibleng mobalhin ang duha ka senador gikan sa majority bloc ngadto sa minority tungod sa giingong wala pag-uyon sa pipila ka mga panghitabo sa Senado.
Gikabutyag ni Senador Raffy Tulfo nga namatikdan niini nga dili kontento ang pipila ka sakop sa mayoriya taliwala sa mga tensyon ug isyu sa sulod sa taas nga kapulungan.
Gitudlo sa senador nga adunay duha ka miyembro sa majority bloc nga dili matud pa komportable sa mga nagakahitabo base sa ilang gipakita nga lihok ug kinaiya, bisan pa man wala niini nganli kon kinsa kini sila.
Sa pagkakaron, adunay 11 ka miyembro ang minority bloc samtang 12 ang naa sa majority bloc. Wala gilakip sa ihap sa aktibong majority members si Senador Ronald dela Rosa, kinsa nagpabilin nga wala magpakita sa publiko human migawas ang arrest warrant batok niini gikan sa International Criminal Court (ICC).
Gumikan sa maong espekulasyon, nagtuo si Tulfo nga posibleng mausab ang balanse sa gahum sa Senado kon adunay mga senador nga mohukom sa pagbalhin og kampo diin lakip sa giatangan ang kausaban sa liderato sa senado.