Tingkagol na sa selda sa kapulisan ang Top 3 ug Top 5 Most Wanted Persons sa lebel sa dakbayan human nasikop sa managlahing manhunt operations sa Malaybalay City niadtong Hunyo 1.
Gipahigayon ang maong mga operasyon sa mga personahe sa Malaybalay City Police Station, inabagan sa Bukidnon Police Provincial Office ug Regional Intelligence Unit (RIU) 10.
Unang natiklo sa Purok 2, Barangay 2, alas 11:43 sa buntag ang Top 3 most wanted nga si Roel Sagubay Llona alyas Roel Aquino Llona, 38 anyos, ug residente sa Barangay Sumpong. Gisilbi kaniya ang warrant of arrest para sa kasong may kalabutan sa ilegal nga armas diin walay girekomendang piyansa.
Pagka-alas 7:57 sa gabii, nasikop usab sa Barangay 9 ang Top 5 most wanted nga si Sonny Boy Ricarte Camiguing, 36 anyos, lumulupyo sa maong dapit. Nag-atubang si Camiguing og kaso sa ilegal nga droga ug wala usab kini gitugotang makapiyansa alang sa iyang temporaryong kagawasan.
Sa pagkakaron, ang duha ka dinakpan kasamtangang anaa na sa kustodiya sa Malaybalay CPS alang sa tukmang dokumentasyon ug hustong disposisyon.