Mipalagag ug midepensa karon ang usa ka drayber sa multicab kalabot sa kontrobersyal nga pag-isyu kaniya og citation ticket sa usa ka traffic enforcer sa Dakbayan sa Malaybalay nga mikalat sa social media.
Sa pakighinabi sa Bombo Radyo Malaybalay gipatin-aw sa drayber nga si Fieth Clyde Ubalde nga nahitabo ang insidente sa may Gaisano area diin matod niya adunay pagpihig ug kalibog sa pagpatuman sa balaod sa dalan. Matod ni Ubalde misunod lang siya sa laing multicab nga unang misulod sa yellow box area apan sa dihang milihok na kini siya ang gipunting ug giisyuhan og ticket sa enforcer nga si Junell Jacutin samtang ang nag-una kaniya wala man lang giabog.
Gidugang sa drayber nga tungod sa giingong dili patas nga pagtratar napugos siya sa pag-video sa insidente aron adunay ebidensya sa ilang panaglalis nga nahitabo niadtong Domingo sa may alas 5:00 ngadto sa alas 5:30 sa hapon.
Apan daling mibarog si Jacutin ug gipasabot nga subay sa City Ordinance 900, klaro ang mga kalapasan sa drayber. Gilakip niini ang obstruction, paglapas sa 15-second rule sulod sa yellow box, ug ang pagmaneho nga naka-tsinelas ug walay hustong uniporme. Giklaro sa enforcer nga wala unta niya dayon isyuhi og ticket ang drayber, apan napugos kini human kini mibalibad sa iyang senyas nga moabante ug giingong nagpadayon sa pagyawyaw ug pakiglalis.