Nagpabiling dakong hagit ang problema sa imprastraktura ug batakang panginahanglanon sa pipila ka tunghaan sa dakbayan sa Malaybalay, taliwala sa nagpadayong Brigada Eskwela 2026 ug sa nagkaduol nga opisyal nga pagbukas sa klase sa sunod semana. Sa Malaybalay City National High School (MCNHS), nag-unang suliran gihapon ang kakulang sa suplay sa tubig nga direktang nakaapekto sa paggamit sa mga comfort room ug sa adlaw-adlaw nga operasyon.
Sa pakighinabi sa Bombo Radyo Malaybalay, gipadayag ni Brigada Eskwela Coordinator Deserree Jane Benson ug Assistant Coordinator Rebecca D. Terro nga nagpabilin kining dakong hagit hinungdan nga nagdepende na lamang ang tunghaan sa rain collector ug limitadong suplay gikan sa gawas, dungan sa water tank nga giayuda sa DPWH isip temporaryong solusyon. Taliwala niini, padayon gihapon ang enrollment ug ang pagpaanindot sa pasilidad sa tabang sa mga ginikanan.Â
Sa pikas bahin, kakulang sa classrooms naman ang nag-unang sagubangon sa Dalwangan Elementary School. Gibutyag ni School Principal IV Sonny M. Rojas nga gawas sa maong kakuwangon, duna pa silay duha ka classrooms nga takdang ipaubos sa demolisyon gumikan sa kadaan ug kadunot niini nga dili na mada pa og repair. Giklaro hinuon ni Rojas nga taliwala sa maong hagit, walay ipahigayon nga klase sa covered court o sa mga hawan nga dapit aron masiguro gihapon ang saktong bentilasyon ug kaluwasan sa mga magtutungha.