Dali daling gidala sa balay tambalanan ang founder sa Gawad Kalinga nga si Antonio “Tony” Meloto, 76-anyos, human makasinati og kalit nga problema sa panglawas samtang anaa sa kustodiya sa mga pulis. Sumala sa taho sa kapulisan, gidali pagdala si Meloto sa Dr. Yanga’s Hospital sa Bocaue, Bulacan human kini nagreklamo nga naglisod sa pagginawa.
Girekomenda sa iyang doktor nga magpabilin una siya sa tambalanan aron mabantayan pag-ayo ang iyang kondisyon ug malikayan ang dugang komplikasyon, ilabi na nga duna usab kini sakit sa panit nga psoriasis. Kahinumduman nga si Meloto nadakpan sa mga awtoridad niadtong Mayo 29 didto sa iyang farm sa Angat, Bulacan tungod sa iyang giatubang nga duha ka ihap sa kasong qualified trafficking in persons (nga walay pyansa) human siya gi-akusahan sa duha ka batan-ong lalaki nga scholars kaniadto sa iyang proyekto. Sa pagkakaron, nagpaabot pa ang Bulacan Police og commitment order gikan sa korte kon asa gyud pormal nga ipabilanggo si Meloto human sa iyang pagka-ospital.