63 ka indibidwal ang nasikop sa kapulisan sa tibuok lalawigan sa Bukidnon pinaagi sa gilusad nga 59 ka managlahing operasyon batok sa nagkadaiyang kriminalidad gikan Mayo 25 hangtod Mayo 31, 2026.
Sa maong lapad nga operasyon sa Bukidnon Police Provincial Office (BUKPPO), nag-una sa listahan ang kampanya batok ilegal nga droga diin 14 ka indibidwal ang natiklo uban ang kapin 46 gramos nga shabu nga nagkantidad og kapin P316,000. Gisundan kini sa pagkapukan sa 12 ka tawo nga nakuhaan og mga kontrabandong sigarilyo nga mabalor og P128,000.
Wala usab nakalingkawas ang 18 ka suspetsado nga milapas sa balaod sa kalikupan—walo niini sa illegal logging ug napulo sa illegal fishing. Samtang laing duha ang nakuhaan og upat ka ilegal nga armas, ug upat ang natiklo sa ilegal nga sugal.
Katapusan, malampuson usab nga nasilbi ang warrant of arrest batok sa usa ka giila nga Most Wanted Person ug 12 ka uban pang wanted nga mga indibidwal aron pormal nga patubagon sa ilang nagpahiping mga kaso sa korte.