Gihatagan og klaripikasyon sa lokal nga kagamhanan sa lungsod sa Quezon, Bukidnon ang isyu kabahin sa dalan sa Barangay Palacapao human sa nahitabong landslide nga nakaapekto sa mga residente ug pasahero sa maong dapit.
Sa eksklusibong pakighinabi sa Bombo Radyo Malaybalay kang Mayor Pablo “Poling” Lorenzo III, gipasabot niini nga nasabtan niya ang kabalaka sa mga residente ug negosyante nga nangita og pamaagi aron masulbad ang kalisod sa pag-agi, apan sigon niini ang maong lugar sakop sa proyekto sa Department of Public Works and Highways (DPWH).
Sumala pa sa Mayor, adunay kasabutan nga maghimo og hagdanan ang DPWH aron magamit sa mga pasahero samtang nagpadayon ang trabaho.
Apan gipasabot usab niini nga dili angay magbuhat og laing dalan ang katawhan gumikan posible kining makompromiso ang ginahimong proyekto sa Bukidnon-Davao Road.
Dugang pa niini, responsibilidad sa DPWH ang seguridad ug kalidad sa maong dalan, hinungdan nga kinahanglan mao gihapon kini ang motutok ug magdumala sa tanang kalihokan.
Gisiguro usab matud oa sa ahensya ang kaluwasan sa mga moagi sa mga dalan. Gipasabot ni Mayor Lorenzo nga paningkamotan niini nga mapaspasan ang trabaho diin gikaingong naghangyo usab ang DPWH nga tugotan nga magdeklara og state of calamity ang lugar aron magamit ang pondo sa munisipyo, lakip na ang emergency funds aron mapadagan ang trabaho 24/7 aron mas dali makumpleto ang proyekto.