Nangayo og mas klarong proseso ug koordinasyon ang sektor sa transportasyon aron matubag ang mga problema sa prangkisa, regulasyon ug panginabuhian sa mga drayber.
Matud sa representante sa sektor nga si Joel Gabatan, usa sa dagkong problema sa mga drayber mao ang kalisod sa pagproseso sa ilang mga dokumento ug pagkuha sa gikinahanglang rekomendasyon alang sa ilang prangkisa.
Gipunting usab niini nga nagkinahanglan og mas klarong koordinasyon tali sa lokal nga kagamhanan ug sa Land Transportation Franchising and Regulatory Board o LTFRB, ilabina sa pag-regulate sa mga drayber ug mga ruta.
Human niini, gihisgutan ang panginahanglan sa pag-organisa sa mga drayber pinaagi sa kooperatiba aron mas dali nilang maatubang ang mga isyu nga may kalabotan sa transportasyon.
Gidugang usab ni Gabatan ang problema sa regulasyon sa trapiko ug prangkisa, diin aniya kinahanglan og klarong papel ang lokal nga kagamhanan ug LTFRB aron dili maglibog ang mga drayber kung asa mangayo og permiso ug rekomendasyon.
Dugang pa niya, kinahanglan usab nga masabtan sa publiko ang kahimtang sa mga drayber ug ang ilang papel sa sektor sa transportasyon, lakip na ang epekto sa mga bayrunon ug buhis sa ilang panginabuhian.