Nakasinati og dakong pagkunhod ang presyo sa lana sa unang adlaw sa negosyo sa world market (Mean of Platts Singapore) taliwala sa panghinaot sa gipahigayong negosasyon tali sa Estados Unidos ug Iran diha sa United Nations.
Nagpakita og maayong timailhan ang pang-unang datos sa trading diin gipanglantawan ang pag-ubos sa presyo sa diesel sa gibanabanang ₱7.40 matag litro, ₱1.35 sa gasolina, ug ₱6.80 sa kerosene. Nakaamot usab sa maong kalamboan ang pormal nga gipagawas nga saad sa Saudi Arabia nga ayuhon ang nadaot nga oil pipeline padulong sa Bab-el-Mandeb Strait.
Kon magpadayon ang maong pag-ubos hangtod sa katapusan sa semana, kini ang magsilbing unang hugna sa rollback human sa tulo ka sunod-sunod nga semana nga pag-alsa sa presyo sa lana diin ang regular nga diesel miabot na sa kapin ₱100 matag litro sa pipila ka mga stasyon sa lana.