Nabaligya sa subasta ang usa ka life jacket nga gigamit sa usa ka pasahero sa RMS Titanic sa panahon sa pagka-unlod niini.
Nahalin kini sa kantidad nga £670,000 (mga $906,000 o kapin P53 milyon).
Ang maong life jacket gipanag-iyahan ni Laura Mabel Francatelli, usa ka pasahero nga sakay sa first class sa bantog nga barko.
Giila kini nga talagsaon ug bililhon sa mga kolektor gumikan adunay mga pirma sa pipila ka mga nakaluwas nga kauban niini sa usa ka lifeboat.
Kini nga butang maoy usa sa mga highlight sa subasta nga gipahigayon sa Henry Aldridge & Son sa Devizes, England, ug napalit sa usa ka wala gipadayag nga bidder.
Ang presyo niini milabaw sa unang banabana nga £250,000 hangtod £350,000.
Lakip usab sa maong auction ang usa ka seat cushion gikan sa lifeboat sa Titanic nga gibaligya sa £390,000 ($527,000), nga napaingon sa mga tag-iya sa duha ka Titanic museums sa Tennessee ug Missouri sa Estados Unidos.
Sumala sa tigsubasta nga si Andrew Aldridge, ang mga butang nga may kalabotan sa Titanic padayon gihapon nga gipangita tungod sa makasaysayanon nga trahedya ug sa mga personal nga istorya nga ilang dala.
Ang RMS Titanic naunlod niadtong Abril 15, 1912 human mabangga sa iceberg sa iyang unang biyahe gikan sa England paingon sa New York City.
Gibanabana nga mga 1,500 sa 2,200 ka pasahero ug tripulante ang namatay sa maong trahedya.