Ipresentar sa sunod nga pagdungog sa House Committee on Justice ang sulod sa income tax returns (ITR) ni Vice President Sara Duterte ug bana niini nga si Atty. Manases Carpio, human gikompirma sa komite nga nasumite na kini sa Bureau of Internal Revenue (BIR).
Sumala kang Justice Committee Chairperson nga si Gerville Luistro, wala na’y pulos ang petisyon nga gisang-at ni Carpio sa Quezon City Regional Trial Court niadtong Abril 13, nga nagtinguha unta nga pugngan ang komite sa pagkuha ug pagpagawas sa ilang ITR.
Kahinumduman nga gi-reklamo ni Carpio ang subpoena nga gipagawas sa komite batok kang BIR Commissioner Charlie Mendoza, nga nagmando kaniya sa pagsumite sa mga dokumento sa buhis nga may kalabutan sa magtiayon ug sa ilang mga negosyo.
Gipunting nila kini nga usa ka paglapas sa Data Privacy Act ug exceedingly overstretched, labi na nga nagsugod pa lang ang termino ni Duterte niadtong Hunyo 30, 2022.
Pormal nga ipresentar ang maong ITR sa pagdungog sa komite karong Abril 22.
Gilauman usab ni Luistro nga hisgutan uban sa BIR ang mga limitasyon bahin sa confidentiality sa maong mga dokumento.
Samtang, gipasabot sa mambabalaod nga mga report lamang gikan sa Anti-Money Laundering Council (AMLC) ang gipatawag sa komite alang sa nakatakdang pagdungog karong Miyerkules may kalabotan sa alegasyon sa unexplained wealth batok sa Bise Presidente.
Lakip sa gipangayong mga dokumento ang covered transactions o mga transaksyon nga moabot og P500,000 pataas ug ang mga suspicious transactions nga obligadong i-report sa mga bangko ngadto sa AMLC bisan unsa pa ang kantidad.