Gisiguro ni Senate President Vicente “Tito” Sotto III ang pagpangandam sa Senado alang sa posibleng paglingkod niini isip impeachment court, kung mapasaka na sa Kamara ang mga reklamo nga nagtinguha nga tangtangon sa pwesto si Vice President Sara Duterte.
Gikumpirma ni Sotto nga siya ang gilauman nga mahimong presiding officer sa maong husay.
Sumla ni Sotto, nga nag-imbitar kini og panihapon sa pipila ka mga senador gikan sa majority bloc aron hisgutan ang posibleng pagdawat sa Articles of Impeachment.
Giklaro usab niini nga dili kini opisyal nga miting o caucus sa Senado.
Giinsistir ni Sotto nga patas ang Senado sa oras sa paglitis ug maghulat sila kung unsay ipresentar sa kanila.
Aron mas mapalig-on ang pagpangandam, matud ni Sotto nga nagpailawom siya og crash program sa Rules of Court aron iangay kini sa kaugalingong proseso sa Senado.
Sukad pa sa Pebrero, nakadawat na usab siya og briefing gikan sa mga abogado sa Court of Appeals ug Court of Tax Appeals.
Sumala sa Article XI Section 3(4) sa 1987 Constitution, gisaad ni Sotto nga moaksyon og “forthwith” sa oras nga madawat nila ang pormal nga reklamo gikan sa Kamara.
Kahinumduman nga ang House Committee on Justice nagsugod na og pagdungog sa impeachment complaints batok kang Duterte niadtong miaging bulan human makita nga ang mga reklamo adunay sakto sa form, substance, ug grounds.
Apan sa pikas bahin, padayon ang baroganan sa Bise Presidente nga ipabasura ang mga kaso batok kaniya tungod sa kakulang sa ebidensya.