Misaka na sa 132 ka insidente sa sunog ang natala sa Bureau of Fire Protection kon BFP sa tibuok lalawigan sa Bukidnon gikan Enero hangtod Setyembre ning tuiga.
Sa eksklusibong pakighinabi sa Bombo Radyo Malaybalay, si SF01 Marvin Talibong, Fire Investigator sa BFP-Bukidnon, nagkanayon nga kasagaran sa mga hinungdan sa maong mga sunog mao ang residential nga nabyaan samtang nagluto ug lakip usab sa kalabot sa electrical connection, sama sa pagka-overheat sa mga applians nga de-kuryente sama sa electric fan.
Usa sa pinakabag-ong insidente mao ang pagkasunog sa Maramag Central Elementary School.
Base sa partial nga imbestigasyon, gibanabana nga nagkantidad og P288,000 ang kadaot sa maong pasilidad.
Apan hangtod karon wala pa masuta ang eksaktong hinungdan sa sunog tungod nagpadayon pa ang imbestigasyon sa otoridad.
Kahinumdoman nga ang maong sunog nahitabo kagahapong adlawa, Oktubre 1, alas 11:45 sa gabii, ug nadeklarang fire-out pasado alas 12:45 sa kaadlawon sa Oktubre 2.
Samtang padayon usab ang pahimangno sa BFP ngadto sa publiko nga magmatngon ug likayan ang pagbiya sa giluto nga pagkaon, siguruhon ang husto nga paggamit sa mga de-kuryenteng kagamitan, ug mag-amping aron malikayan ang sunog