Nanawagan karon og dinalian ug mas hugot nga aksyon ang mga residente sa Barangay Mailag, Valencia City human sa sunod-sunod nga insidente sa pagpangawat sa manok ug motorsiklo nga nagpabiling wala pa masulbad hangtod karon.
Sa pakighinabi sa Bombo Radyo Malaybalay, gibutyag sa biktimang si Jose Richard Revilla nga lima ka mga manok-pangtari ang nakuha kaniya sa duha ka managlahing higayon sa kadlawon didto sa Purok 8A, Dabongdabong. Bisan pa ug na-report na sa purok leader, wala pa gihapoy nailhang suspek samtang nagpadayon ang imbestigasyon.
Gawas niini, narekord usab ang pagkawala sa usa ka bag-ong utang nga Mio Gravis nga motorsiklo nga gipanag-iyahan sa igsoon ni Juliet Pastrano niadtong Pebrero 22. Sumala pa nga miagi sa bintana sa CR ang kawatan aron makuha ang yawe sulod sa balay.
Tungod kay halos matag balay sa ilang dapit ang nakasinati na og kawat sa nangaging mga bulan, naghangyo ang mga biktima ngadto sa barangay ug kapulisan nga pakusgan ang pagpatrolya, ilabina sa kadlawon.
Sa pagkakaron, padayon pang gina-contact sa Bombo Radyo Malaybalay ang opisyal nga pamahayag ug dinalian nga aksyon sa pamunuan sa Barangay Mailag kalabot sa maong bahad sa seguridad sa ilang komunidad.