Nag-atubang og silot nga pagkabilanggo ug dakong multa ang tag-iya sa usa ka two-Michelin-star restaurant sa Gangnam District, Seoul, South Korea human nasakpan nga naggamit og dili-otorisadong mga amigas (ants) isip sagol sa ilang mga pagkaon.
Sa imbestigasyon sa Ministry of Food and Drug Safety sa South Korea, nadiskobrehan pinaagi sa mga online review ug mga hulagway nga miabot sa kapin 49,000 ka imported nga amigas gikan sa Estados Unidos ug Thailand ang gigamit sa restawran nga “Evett” sulod sa upat ka tuig alang sa ilang ice cream ug uban pang mga putahe. Bawal ang paggamit sa amigas sa maong nasud tungod kay wala kini nalakip sa 10 ka matang sa insekto nga giaprubahan sa gobyerno alang sa pagkaon sa tawo.
Dugang pa sa mga awtoridad sa pampublikong panglawas, nasakpan nga ang pipila sa maong mga amigas adunay lebel sa heavy metals nga 55 ka pilo nga mas taas kumpara sa giuyonan nga sukdanan alang sa mga edible insects. Kon mapamatud-an nga nakasala, mahimong mag-atubang ang tag-iya og usa ka tuig nga pagkabilanggo ug multa nga 20 milyones Korean won.