Gihuptan karon sa usa ka expert authenticator gikan sa U.S. nga si John Reznikoff ang Guinness World Record alang sa kinadak-ang koleksiyon sa buhok sa mga sikat nga personalidad sa tibuok kalibotan.
Naangkon niini ang titulo niadtong 2001 human natigom ang 115 ka mga sample sa buhok, lakip na ang gikan kang Abraham Lincoln, Marilyn Monroe, ug Albert Einstein.
Gibana-banaan ang maong talagsaong koleksiyon nga nagkantidad og kapin sa $1.8 million o mukabat sa P100 milyon.
Matud ni Reznikoff, nagsugod kining maong kalingawan gikan sa tradisyon sa Victorian era diin buhok ang pangayuon inay nga autograph gikan sa mga iladong personalidad.
Ang uban sa iyang mga koleksiyon adunay makapakurog nga kagahapon, sama sa buhok ni Lincoln nga gikuha mismo gikan sa samad sa ulo niini sa gabii sa iyang asasinasyon.
Bisan pa sa kadaghan sa iyang koleksiyon, aduna siyay estriktong lagda nga mokuha lamang og buhok gikan sa mga sikat nga mipanaw na.
Kini human siya hapit mapasakai og kaso sa astronaut nga si Neil Armstrong sa dihang misulay siya og palit sa pinutlan nga buhok niini gikan sa usa ka barbero.