Kapin sa 300,000 litros sa gituohang smuggled diesel nga mobalor sa ₱41 milyon ang nasakmit sa otoridad, dungan sa pagkasikop sa duha ka crew member sa usa ka marine tanker sa Northern Mindanao niadtong Abril 9, 2026.
Sa pakighinabi sa Bombo Radyo Malaybalay ngadto kang PMaj. Joann G. Navarro, ang tigpamaba sa Police Regional Office (PRO)-10, gibutyag niini nga ang maong operasyon gikasas sa 101st Company sa Regional Mobile Force Battalion-10, kauban ang Misamis Oriental PPO, PNP Maritime Group, Philippine Coast Guard, ug Bureau of Customs (BOC). Nahitabo ang pagsingabot human makadawat ang otoridad og impormasyon bahin sa mga bangka nga giingong naghakot og krudo gikan sa maong tanker.
Atol sa gihimong inspeksyon, nasuta nga diesel ang karga sa barko rason nga daling gidakop ang kapitan ug ang chief mate niini. Gipasakaan na ang mga suspek og kasong paglapas sa Customs Modernization and Tariff Act niadtong Abril 10.
Gibutyag usab ni Navarro nga gituyo sa pag-off sa barko ang ilang Automatic Identification System (AIS) ug gi-delete ang tanang data niini aron dili masubay ang ilang nahimutangan. Padayon pa ang gihimong lawom nga imbestigasyon aron matino kon diin gikan ang maong diesel ug kinsa ang mga “utok” luyo sa maong smuggling operation.
Gituohan nga ang maong krudo ipang-apod-apod unta sa nagkadaiyang dapit sa Northern Mindanao, ilabina taliwala sa nasinati nga kakulang sa supply sa lana sa rehiyon. Sa pagkakaron, gipahingusgan pa sa PRO-10 ang monitoring batok sa ilegal nga pagbaligya sa petroleum products sa tibuok rehiyon.