Nasabat sa Police Regional Office 10 ang kapin ₱27 milyones nga kantidad sa ilegal nga droga sa tibuok Northern Mindanao sulod lamang sa unang baynte ka adlaw sa bulan sa Marso 2026.
Sa gipahigayon nga press briefing ni PBGen. Cristopher N. Abrahano, Regional Director sa PRO-10, gipahibalo niini nga miresulta ang ilang gihingusgan nga kampanya sa pagkasakmit sa kapin 4 ka kilo (4,014.753 gramos) nga gituohang shabu gikan sa Marso 1 hangtod 20.
Pinaagi sa 192 ka malampusong operasyon, mikabat sa 219 ka mga indibidwal ang nadakpan ug pasakahan na karon og tukmang kaso.
Kini nga kalamposan bunga sa walay puas nga paningkamot sa kapulisan sa rehiyon aron mapanalipdan ang komunidad batok sa dautang epekto sa ginadiling droga ug mamentinar ang kahusay ug kalinaw sa tibuok amihanang bahin sa Mindanao.
Gipasiugda usab sa opisyal ang dedikasyon sa kapulisan sa padayon nga kampanya aron mapanalipdan ang komunidad batok sa ilegal nga droga.
Lakip sa gipagawas nga accomplishment reports mao ang kampanya batok sa loose firearms diin miresulta kini sa pagkasakmit sa 64 ka mga armas ug pagkasikop sa 20 ka indibidwal pinaagi sa 62 ka mga operasyon.
Gisundan kini sa hugot nga operasyon batok sa illegal gambling nga mitala og 36 ka buy-bust diin 49 ka personahe ang nasikop uban sa ₱13,587.00 nga cash ug mga kagamitan sa sugal.
Samtang mikabat usa sa 208 ka mga indibidwal ang na-neutralize sa tibuok rehiyon diin 41 niini ang giila nga “Most Wanted Persons” uban ang 167 wanted nga personahe.