Nasapon sa mga otoridad ang usa ka wing van nga nagdala og gibana-banaang P2.5 milyon nga kantidad sa gituohang iligal nga copper minerals sa Boundary Control Point (BCP) sa Barangay Dalipuga, Iligan City, niadtong Abril 2, 2026 sa hapon.
Sumala sa report, takes alas 5:30 sa hapon sa dihang gipahunong sa mga personahe sa Dalipuga BCP ang usa ka berde nga Fuso Wing Van Truck Super Great nga gimaneho sa usa ka 25-anyos nga lalaki nga residente sa Alubijid, Misamis Oriental. Nasuta nga ang kargamento gikan pa sa Siayan, Zamboanga del Sur.
Sa gihimong inspeksyon, napakyas ang drayber sa pagpresentar og mga gikinahanglang permit, transport documents, ug awtoridad gikan sa gobyerno alang sa pagbiyahe sa maong mineral resources. Atubangan ni Barangay Kagawad Johnny Tingcang ug mga personahe sa Mines and Geosciences Bureau (MGB), miangkon ang drayber nga copper mineral ore ang sulod sa iyang gidrayban nga sakyanan.
Mikabat sa kapin kon kulang 500 ka sako sa copper-bearing mineral ores ang narekober nga adunay gibanabanaang nagkantidad og P2.5 milyon.
Sa pagkakaron, ang wing van ug ang mga narekober nga mineral gidala ug gitugyan ngadto sa Mines and Geosciences Bureau (MGB) Region 10 sa Cagayan de Oro City alang sa hustong beripikasyon ug assessment. Ang drayber gimanduan usab nga moatubang sa maong buhatan alang sa adjudication proceedings.