Gikatakdang ipakatap sa Police Regional Office 10 (PRO-10) ang kapin sa 2,000 ka mga pulis sa tibuok rehiyon sa Northern Mindanao isip kabahin sa pagpatuman sa heightened alert status ning naghinangat nga Semana Santa.
Kini ang gikumpirma ni PRO-10 Director, Brigadier General Christopher Abrahano, human gipagawas ang direktiba gikan sa PNP Camp Crame nga walay ipatuman nga bakasyon alang sa mga kapulisan sugod karong Marso 29 hangtod Abril 6. Atol sa press briefing kagahapon, gipasabot ni Abrahano nga tumong niini ang pagsiguro sa kaluwasan sa publiko, ilabi na sa mga dapit nga sagad dagsaon sa katawhan.
Kauban sa maong deployment ang mga sakop sa Philippine Coast Guard (PCG), Bureau of Fire Protection (BFP), Armed Forces of the Philippines (AFP), mga traffic enforcers, ug mga force multipliers sa barangay. Tutokan sa maong pwersa ang pagbantay sa mga “places of convergence” sama sa mga pilgrimage sites, simbahan, pantalan, bus terminals, ug mga tugpahanan.
Human sa Semana Santa, isunod usab sa PNP ang pagpatuman sa programa nga “Ligtas SumVac 2026.” Ubos niini, padayon nga bantayan ang mga sikat nga tourist spots, mga resort, kadagatan, ug mga hotel nga sagad bisitahan sa mga bakasyonista.
Tumong sa maong hugot nga seguridad nga maprotektahan ang publiko batok sa mga dautang elemento nga posibleng mopahimulos sa panahon sa summer vacation ug Semana Santa.