Kapin sa ₱66.9 milyon nga kantidad sa nagkadaiyang kontrabando ug 163 ka indibidwal ang natala sa Police Regional Office (PRO)-10 sa gihimong serye sa operasyon sa tibuok Northern Mindanao sulod lamang sa usa ka semana.
Sa pakighinabi sa Bombo Radyo Malaybalay ngadto kang PMaj. Joann G. Navarro, ang tigpamaba sa PRO-10, gibutyag niini nga gikan niadtong Abril 2 hangtod 8, 2026, ang maong mga dinakpan ug nakumpiskang mga ebidensya nakuha gikan sa mga operasyon batok sa ilegal nga droga, sugal, smuggled cigarettes, ug illegal mining.
Sa kampanya batok sa smuggled cigarettes, miabot sa ₱59 milyones ang kantidad sa mga sigarilyo nga nasakmit dungan sa pagkaaresto sa 13 ka mga personahe. Sa bahin usab sa illegal mining, lima ka mga suspetsado ang nadakpan diin nakuhaan sila og mga ekipo ug materyales nga mobalor sa ₱5.5 milyon.
Mitala usab ang otoridad og 62 ka mga drug personalities nga nasikop human nakuhaan og mga ilegal nga droga nga adunay gibanabanang balor nga ₱2.4 milyon. Samtang sa illegal gambling, miabot sa 83 ka mga personahe ang nasikop diin nakuha gikan kanila ang kapin ₱35,000 nga bet money ug nagkadaiyang mga kagamitan sa sugal.
Sumala ni PMaj. Navarro, kining maong mga operasyon kabahin sa gihimong lakang sa rehiyon 10 aron mapugngan ang kriminalidad ug mapatunhay ang kahapsay sa tibuok Northern Mindanao. Sa pagkakaron, ang mga dinakpan nag-atubang na sa saktong disposisyon ug mga kaso sa korte.