Mikabat sa kapin ₱1 milyones ang kantidad sa gituohang ilegal nga droga human nasakmit atol sa usa ka buy-bust operation nga gihimo sa Kalilangan Municipal Police Station niadtongmilabayng adlaw sa may Purok 1, Barangay Central Poblacion, Kalilangan, Bukidnon.
Sa maong operasyon, nadakpan ang duha ka personahe lakip ang usa ka 28-anyos nga giilang si alias “Abdul,” ug giisip nga high value individual, uban sa usa ka 23-anyos nga lalaki.
Ang operasyon gipangulohan sa Kalilangan MPS ubos sa pagdumala ni PCPT Romeo M. Arcilla Jr., OIC, inubanan sa Provincial Intelligence Unit, 1004th RMFB-10 ug PDEA-10.
Human masakmit sa kapulisan ang kapin 159.47 gramos sa gituohang shabu nga adunay standard drug price nga ₱1,084,396.00. Lakip sa mga ebidensiya ang daghang heat-sealed plastic sachet, cellphone, kuwarta, mga pouch, wallet, gunting, ID, ug usa ka motorsiklo.
Ang duha ka suspek gidala sa Kalilangan MPS alang sa tukmang disposisyon samtang ang mga nasakmit nga ebidensiya gipadala sa Provincial Forensic Unit alang sa eksaminasyon diin giandam na usab ang kaso batok sa mga suspek alang sa paglapas sa RA 9165, Sections 5 ug 11, Article II.