Nagpahimangno si kanhi Senador Antonio Trillanes IV ngadto sa mga pulitiko nga nagplano nga mubalhin og suporta gikan sa kasamtangang administrasyon ngadto kang VP Sara Duterte.
Matud sa kanhi senador, kinahanglan nga maghinay-hinay ug dili magdalidali sa paghimo og desisyon ang maong mga opisyal ilabi na kung ang bugtong basehan mao lamang ang popularidad sa bise presidente.
Gihisgutan ni Trillanes ang kasaysayan sa politika niadtong panahon sa Aquino administration diin si kanhi Bise Presidente Jejomar Binay nakatala og hilabihan ka taas nga popularidad.
Iyang gipahinumdoman ang publiko nga niabot kaniadto og kapin sa 70 porsyento ang voter preference ni Binay sa mga survey mas taas pa kon itandi sa kasamtangang numero ni VP Sara Duterte apan sa katapusan, napakyas gihapon kini sa pagdaug sa 2016 presidential elections.
Sa laing bahin, gitubag usab sa kanhi senador ang mga akusasyon gikan sa kampo ni Duterte nga pamulitika lamang ang iyang pagpasaka og kasong plunder ug graft.
Matud ni Trillanes, mas mapuslanon kung tubagon na lang sa bise presidente ang mga ebidensya ug alegasyon nga anaa sa iyang reklamo kaysa sa paghatag og mga kumentaryo batok kaniya.
Kasamtangan, nagpabilin ang hagit ni Trillanes ngadto sa kampo ni VP Sara Duterte nga atubangon ang mga kasong legal nga gisang-at batok kanila.