Gibutyag karon sa Malaybalay City Water District nga nakita niini nga mahimong problema ang panubig sa umaabot nga Northern Mindanao Regional Athletic Association nga ipahigayon sa lalawigan.
Matud ni Engr. Nolito S. Binahon, General Manager sa Malaybalay City Water District, sa kapin kon kulang 9000 ka delegado, dili igo ang suplay sa panubig sa syudad hilabi na sa palpak nga panerbisyo sa PrimeWater.
Taliwala nga wala kini nalakip sa pagplano sa maong aktibidad, aduna na kini inisyatiba sa pag-andam sa mga tanke sa kung gikinahanglan.
Subay niini nga problema sa panubig, gisiguro usab sa DepEd Bukidnon pinaagi ni Said Macabago, Public Schools District Supervisor ug Division Information Officer, nga nakig-alayon sa mga buhatan nga makahatag og water logistics support ug mga water tanks.
Gipasalig usab ni Mayor Jay Warren R. Pabillaran, nga hugot usab niining gitutokan ang unang panginahanglanon sa mga delegado sama sa panubig, matulgan ug uban pang angay ikaalagad alang sa seguridad ug kaayohan sa mga delegado.