Gisagop sa usa ka mabdos nga iring ang usa ka gamay’ng koneho isip usa sa iyang mga anak.
Ang maong paghitabo nakakurat sa pamilya ni Kathy Price sa Oklahoma nga diin mao usab ang misagop sa maong iring.
Mga duha ka bulan na ang milabay sukad mitunga ang iring sa balkonahe sa ilang balay ug ilang gipasulod samtang gipangita pa ang posibleng tag-iya niini hangtud nanganak kini og lima ka kuting.
Apan paglabay sa pipila ka adlaw, nakurat si Kathy ug ang iyang bana dihang ilang nakita nga ang lima ka kuting nahimong unom.
Didto nila nasayran nga ang ika-unom dili kuting kundili usa ka gamay’ng rabbit.
Mas nakatandog pa kanila ang kahimtang tungod kay gidawat sa inahan nga iring ang koneho isip kaugalingong anak ug gi-amuma kini uban sa iyang mga kuting.
Nagkatawa na lang ang magtiayon ug miingon nga maayo na lang kay koneho ang iyang gisagop ug dili ilaga.
Karon, nangita si Price og permanenteng panimalay alang sa iring, sa lima ka kuting, ug sa koneho nga ilang giatiman, gumikan nabalaka siya sa ilang kaluwasan tungod sa doul ang ilang puy-anan sa usa ka busy nga highway.