Nakapasa na ang International Criminal Court (ICC) sa ika-pito nga batch sa ebidensya batok kang kanhi Pangulong Rodrigo Duterte, may kalabotan sa kaso nga crime against humanity tungod sa giingong dugoong kampanya batok sa droga o ‘war on drugs.
Nasayran nga niadtong Mayo 30, ang prosekusyon mipasa og dugang nga 129 ka items nga ebidensya, gawas pa sa 267 nga ebidensya nga una nang gisumite sukad nagsugod ang disclosure period niadtong Abril 30.Matod ni ICC Prosecutor Karim Khan nga temporaryong naka-leave samtang giimbestigahan sa giingong misconduct nga aduna na silay kapin 130,000 ka dokumento nga nakasulod sa ilang relativity database nga kinahanglan pa susihon ug repasohon sa dili pa kini ipahibalo o isiwalat sa pikas kampo.
Gihatagan og deadline ang prosekusyon hangtod Hulyo 1 aron makompleto ang pagsumite sa tanang ebidensyang gamiton para sa naka-iskedyul nga hearing sa Setyembre 23.Nahinumduman nga nadakpan si Duterte niadtong Marso 11 ubos sa international warrant tungod sa kaso nga crimes against humanity.
Sumala sa mga grupo sa Human rights, kapin 30,000 ka tawo ang napatay ubos sa iyang kampanya batok sa droga.Sa pagkakaron, nagpabilin si Duterte nga naka detain sa headquarters sa ICC sa The Hague, Netherlands.Nasayran usab nga niadtong Mayo, gibasura sa ICC ang hangyo sa kampo ni Duterte nga ipadisqualify ang duha ka huwes sa ICC nga nagdumala sa iyang kaso.