Nanawagan ang International Coalition Human Rights Group sa Pilipinas (ICHRP) sa International Criminal Court (ICC) sa dali nga pagpagawas og arrest warrants batok sa mga kanhi ug kasamtangang opisyal sa gobyerno nga gitawag nga “co-perpetrators” sa giignong crimes against humanity nga may kalabotan sa kampanya kontra droga ni kanhi Presidente Rodrigo Duterte.
Sumala ni ICHRP Chairperson Peter Murphy nga angay usisahon usab ang mga opisyal nga gilangkob uban ni Duterte nga kasamtangang naa sa kustodiya sa ICC.
Matud ni Murphy, nga klaro nga dili makaya sa sistema sa hudikatura sa Pilipinas ang pagsilot sa mga giingong nalambigit, ug samtang anaa sa kagawasan ang mga opisyal, posible nga madaut ang mga ebidensya, mahadlok ang mga testigo, o makalikay sa ilang kasaypanan.
Gipunting usab sa grupo nga ang pagdungog sa confirmation of charges sa Pebrero 23 usa ka hinungdanon nga lakang para sa mga biktima sa war on drugs.
Gidawat usab sa ICHRP ang desisyon sa ICC Pre-Trial Chamber kaniadtong Enero 26 nga gisalikway ang mga mosyon sa depensa ni Duterte nga dili siya fit sa trial, adunay kagawasan, o ilangan ang pagdungog, ug ang mga alegasyon nga dili patas ang proseso.