VALENCIA CITY, BUKIDNON — Nagtingkagol na karon sa bilanggoan ang usa ka giingong High-Value Individual (HVI) human kini madakpan sa gikasang drug buy-bust operation didto sa Purok 4, Barangay Bagontaas, Valencia City, niadtong Hulyo 12, sa alas-7:18 sa gabii.
Giila ang suspetsado sa alyas nga “Jaco”, 40-anyos, kansa lakip sa Drug Information list sa mga awtoridad. Sa report ni Bukidnon Police Provincial Office Director PCOL Oliver Sotto Navales ngadto kang Regional Director PBGEN Christopher Nortez Abrahano, ang malampusong operasyon hiniusang gilusad sa Valencia City Police Station, 2nd Bukidnon PMFC, ug Bukidnon Provincial Intelligence Unit (PIU).
Narekober gikan sa posisyon sa suspetsado ang upat ka sachet sa gidudahang shabu (usa ka gamay, duha ka medium, ug usa ka dako) nga motimbang og 9.10 gramos ug adunay Standard Drug Price (SDP) nga nagkantidad og ₱61,880.00. Lakip sa gisakmit ang usa ka itom nga coin purse nga gihimong sudlanan sa kontrabando, usa ka selpon, ug ang ₱500 nga buy-bust money.
Kasamtangang anaa sa kustodiya sa Valencia CPS ang dinakpan samtang giandam na ang kasong pagsupak sa Section 5 ug 11 sa Republic Act 9165 (Comprehensive Dangerous Drugs Act of 2002) batok kaniya, ug ang mga ebidensya gidala na sa Bukidnon Provincial Forensic Unit alang sa eksaminasyon.