Walay nakitang bisan unsang timailhan sa foul play ang mga awtoridad human nakaplagang patay ang usa ka 53-anyos nga mamumuo sulod mismo sa iyang bunkhouse didto sa Sitio Ticub, Brgy. Pamotolon, Kalilangan, Bukidnon.
Sa report ni Bukidnon PPO Director PCOL Oliver Sotto Navales ngadto kang Regional Director PBGEN Christopher Nortez Abrahano, usa ka 21-anyos nga kauban sa trabaho sa biktima ang unang nakadiskubre sa patay’ng lawas niini niadtong Hulyo 12, sa alas-9:45 sa buntag, diin dinalian kining nangayo og tabang sa Kalilangan Municipal Police Station. Sa pag-abot sa mga pulis, naabtan ang biktima nga naghayang na sa iyang higdaanan.
Gidala pa ang biktima sa Bukidnon Provincial Hospital sa Kalilangan apan gideklarar kini sa duty physician nga nakalas na gumikan sa cardiac arrest o pag-atake sa kasingkasing. Nasayran sa inisyal nga imbestigasyon nga aduna nay daang kasaysayan sa sakit nga hypertension o alta presyon ang biktima niadtong miaging tuig, nga maoy gituohang rason sa kalit niining kamatayon. Ang patay’ng lawas anaa na karon giatiman sa usa ka punerarya sa lungsod.