Moabot na ngadto sa 51 ka tawo ang gikulatang nakalas samtang kapin sa usa ka milyon ka mga residente ang grabeng naapektuhan tungod sa lapad nga pagbaha ug pagguho sa yuta sa nasod sa Bangladesh. Kini human sa sunod-sunod nga mga adlaw sa walay undang nga kusog nga pag-ulan nga dala sa tinuig nga monsoon season.
Gawas sa mga nangamatay, duna sab kapin sa 39 ka tawo ang nangaangol ug liboan ka mga pamilya ang nawad-an sa ilang mga panimalay human giguba sa kalit nga baha o flash flood, ilabi na dapit sa kaulohan niini nga Dhaka ug sa mga silingang dapit. Sumala sa taho sa Ministry of Disaster Management and Relief sa maong nasod, kapin sa tunga sa ihap sa mga nangamatay ang narekord didto sa Cox’s Bazar, nga maoy gipamuy-an usab sa dako nga populasyon sa mga Rohingya refugees diin nahitabo ang serye sa mga pagdahili sa yuta.
Sa pagkakaron, gipamutang na sa mga temporaryong evacuation center ug shelters sa kagamhanan ang mga apektadong residente samtang padayon ang gihimo nga rescue ug relief operations sa mga dapit nga nasalanta. Nagpabilin usab nga naka-heightened alert ang mga otoridad tungod kay posible pa nga mosaka ang tubig-baha sa amihanan ug silangan nga bahin sa nasod samtang wala pa hingpit nga nihunong ang dautang dagan sa panahon.