Nag-antus sa tambalanan ang usa ka 29-anyos nga lalaki human kini gidunggab taliwala sa ilang lalis sa iyang kauban bahin sa nawala nga cellphone sa Purok 5A, South Poblacion, Maramag, Bukidnon niadtong Agosto 22 sa gabion.
Subay sa report nga gipagawas ni Bukidnon Police Provincial Office (Buk PPO) Director PCOL Oliver Sotto Navales gikan sa Maramag Municipal Police Station (MPS), nahitabo ang insidente mga alas 6:20 sa gabion. Giila ang suspek sa alyas nga “Snipe”, 36 anyos.
Sumala sa imbestigasyon sa kapolisan, miulbo ang init nga lalis sa duha dihang gipangita sa suspek ang iyang nawala nga cellphone. Sa tunga-tunga sa ilang away, gidunggab sa suspek ang biktima sa wala nga bahin sa iyang lawas. Nakit-an na lang ang biktima nga nagdugo nga migawas sa balay sa suspek, hinungdan nga dali kini nga gidala sa Bukidnon Provincial Hospital (BPH)-Maramag.
Nakuha sa lugar ang usa ka guba nga kutsilyo nga giingong gigamit sa krimen. Kasamtangang nagpahigayon og hot pursuit operation ang Maramag MPS alang sa pagdakop sa suspek nga dali nga misibat pagkahuman sa insidente.