Gilauman sa goberno sa America nga mohupay na ang agresibo nga aksyon sa West Philippines Sea, human sa panagbangga sa duha ka barko sa China human sa gituohan nga pagbabag niini sa barko sa Pilipinas sa Scarborough Shoal niadtong Lunes, Agosto 11.
Sa usa ka pamahayag, mibutyag og kalooy ang Amerika pinaagi ni US Ambassador to the Philippines Marykay Carlson mahitungod sa nahitabong collision incident ug naglaum nga kini mahimong usa ka “watershed event” nga posibleng moresulta sa pagkunhod sa agresibong mga lihok sa WPS.
Giklaro usab sa US envoy ang deployment sa duha ka barko nga pang-giyera sa US Navy nga USS Higgins ug USS Cincinnati duol sa Panatag Shoal (Scarborough Shoal) usa ka adlaw human sa panagbangga sa mga barko sa China sa maong dapit.