Gidaghanon sa namatay sa suicide bombing sa usa ka mosque sa Pakistan, misaka na sa 31, kapin 160 ang angol

Mikabat na sa 31 ka tawo ang nakalas samtang kapin sa 160 ang nangaangol human sa usa ka suicide bombing sa usa ka Shiite mosque sa Islamabad, Pakistan, niadtong Biyernes. Sumala sa mga otoridad, gipahunong ang suspek sa ganghaan sa Khadija Tul Kubra Mosque sa Tarlai, apan kalit kining nagpabuto sa iyang kaugalingon atol sa Biyernes nga pag-ampo.

Ang grupong Islamic State (IS) ang niangkon sa responsibilidad sa maong mangilngig nga pag-atake. Tungod sa kakusog sa pagbuto, daghang mga deboto ang nangalubong sa mga debris ug daling gipangdala sa mga tambalanan ang mga biktima. Gimando na ni Prime Minister Shehbaz Sharif ang usa ka dinaliang imbestigasyon aron masiguro ang hustisya alang sa mga biktima sa maong trahedya.